ရေကြောင်းလမ်းဖြင့် သယ်ယူ ပို့ဆောင်ခြင်း၏ အားသာချက်များ

ခေတ်အဆက်ဆက် မည်သို့ပင်ပြောင်းခဲ့စေကာမူ၊ မြန်မာနိုင်ငံ၏ မြစ်ကြီးများ၊ မြစ်ငယ်များနှင့် ဆက်စပ်ဧရိယာများ စသည့်အနေအထားမှာ ပြောင်းလဲခြင်းမရှိရလေကား သင်္ဘောအမျိုးမျိုးပြောင်း သွားသော်လည်း ရေစူးရေလာကန့်သတ်ချက်များသည် ပြောင်းလဲမှုမရှိသလောက်ပင် တည်ရှိနေပါ သည်။ မြန်မာနိုင်ငံတွင် နိုင်ငံခြားသွားခြင်းနှင့် ပင်လယ်ကမ်းနီး ခရီးသွားခြင်းများအတွက် မြန်မာ့ ကြယ်ငါးပွင့် သင်္ဘောလုပ်ငန်းဟူ၍တည်ရှိသော်လည်း၊ တစ်ချို့ကုန်စည်စီးဆင်းမှုများသည် မြစ်တွင်းမှ ပင်လယ်၊ ပင်လယ် နှင့် ကုန်းလမ်းခရီးများ သွားလာလှုပ်ရှားရခြင်းများ၊ ဥပမာ သံလွင်မြစ်ကြောင်း ဘားအံ့အနီးမှ ဘိလပ်မြေများကို မုတ္တမပင်လယ်ကိုဖြတ်၍ ရန်ကုန်မြစ်အတွင်း သယ်ပို့ရခြင်း၊ ရန်ကုန်မြို့မှ မုတ္တပင်လယ်ကွေ့ကိုဖြတ်၍ တနင်္သာရီကမ်းရိုးတန်းအတွင်းပိုင်း ရေတိမ်နေရာများသို့ သွားလာရခြင်းများအတွက် ရေလမ်းခရီးမှာ များစွာအသုံးဝင်လျှက်ရှိနေပါသည်။

မြန်မာနိုင်ငံတွင် လူဦးရေ၏တိုးနှုန်းမှာ (၂)ရာခိုင်နှုန်းမှန်မှန်ကြီး တိုးတက်လာနေရာ ယခုအခါ လူဦးရေ သန်း၆၀ကျော်ရှိပြီးဟု ခန့်မှန်းရပါသည်။ အထူးအားဖြင့် မြစ်ဝကျွန်းပေါ်ဒေသ၊ မြစ်ကြောင်းများတစ်လျှောက်သည် လူနေထူထပ်သော ဒေသများဖြစ်နေသဖြင့် ရေကြောင်းသွားလာမှုသည် ဆက်လက်လိုအပ်နေဦးမည် သာ ဖြစ်ပါသည်။

တိုးတက်သောကမ္ဘာနိုင်ငံကြီးများတွင် (Transport Mode) ဟုခေါ်ဆိုအပ်သော၊ ခရီးသွားနည်းအမျိုးမျိုးကို နည်းသစ်များ မည်မျှပင်ပေါ်ပေါက်နေပါစေ၊ နည်းဟောင်းများကိုလည်း မပျောက်ပျက်အောင် ထိန်းသိမ်း သုံးစွဲလျှက်ပင်ရှိသေးကြောင်း သတိပြုအပ်ပါသည်။

      မြန်မာနိုင်ငံရှိ မြစ်မကြီးများ ဖြစ်သည့် ဧရာဝတီမြစ်၊ ချင်းတွင်းမြစ်နှင့် အများစုသော မြစ်များသည် မြောက် မှတောင်သို့ မြေဩဇာကောင်း မွန်သော မြေပြန့် လွင်ပြင်များကို ဖြတ်သန်း စီးဆင်းလျက် ရှိပါသည်။ မြန်မာနိုင်ငံ အတွင်း ကုန်စည်ကူးသန်း သွားလာနိုင်သည့် ရေကြောင်းလမ်း များသည် အခြားသော သယ်ယူ ပို့ဆောင်မှု နည်းလမ်းများ ဖြစ်သည့် ကုန်းလမ်း၊ မီးရထားလမ်း၊ လေကြောင်းလမ်း စသည့် သယ်ယူ ပို့ဆောင်ရေး နည်းလမ်းများထက် အောက်ပါ အချက်များတွင် အားသာချက်များ ရှိပါသည်။

  • လေးလံသည့် ကုန်ပစ္စည်းများ၊ တန်ချိန်များသည့် ကုန်ပစ္စည်းများနှင့် ဝန်ကျယ်သည့် ကုန်ပစ္စည်းများကို ကုန်ကျစရိတ် အနည်းဆုံးဖြင့် သယ်ယူ ပေးနိုင်ခြင်း။
  • သယ်ယူရာတွင် အချိန်ကြာသော်လည်း တစ်ကြိမ်တည်း၊ တစ်နေရာတည်းသို့ တန်ချိန် မြောက်များစွာ ပို့ဆောင်နိုင်ခြင်း။
  • သယ်ယူ ပို့ဆောင်သည့် ယာဉ်များအတွက် အသုံးပြုသည့် စွမ်းအင် လောင်စာဆီ ကုန်ကျစရိတ်မှာ အခြားနည်းလမ်းများထက် သက်သာခြင်း၊ ပတ်ဝန်းကျင် လေထု ညစ်ညမ်းမှု သက်သာခြင်း။
  • အခြား သယ်ယူပို့ဆောင်မှု နည်းလမ်းများကဲ့သို့ လေယာဉ်ကွင်းများ၊ မီးရထားလမ်းများ၊ မော်တော်ကားလမ်းများ၊ တံတားကြီးများကို သီးခြား တည်ဆောက်ဖောက် လုပ်ရန်အတွက် မလိုအပ်ဘဲ သဘာဝက ပေးအပ်ထားသည့် ရေကြောင်းလမ်း ကိုသာ အနည်းငယ် ပြုပြင် ထိန်းသိမ်းပြီး အသုံးပြုနိုင်ခြင်း။
  • စက်မှုဖွံ့ဖြိုး တိုးတက်ရန် အတွက် မြစ်မကြီးများ၏ ပတ်ဝန်းကျင်ရှိ စက်ရုံ/ အလုပ်ရုံများ အတွက် ကုန်ကြမ်းပစ္စည်းများ၊ ကုန်ချော ပစ္စည်းများကို ကုန်ကျစရိတ် သက်သာစွာဖြင့် သယ်ယူ ပို့ဆောင်နိုင်ခြင်း။