စစ်တွေနှင့် တောင်ကုတ်မြို့များရှိ IWT ဆိပ်ကမ်းများတွင် Japan နိုင်ငံမှ ထုတ်လုပ်သည့် ဖိုက်ဘာ ဆိပ်ခံများဖြင့် ချိတ်ဆက်ထားသော ဆိပ်ခံ တံတား (၂) စင်း တပ်ဆင် ပြီးစီး
- Japan's Grant Aid for the Economic and Social Development Programme for the Republic of the Union of Myanmar (FY 2016) အရ ဂျပန်နိုင်ငံတွင် အသုံးပြုဆဲ ရေယာဉ်(၂) စီးနှင့် Technical assistance တို့အတွက် အကူအညီ ပေးအပ်ခဲ့ရာ "ကစ္ဆပနဒီ-၁" နှင့် "ကစ္ဆပနဒီ-၂" ရေယာဉ် (၂) စီးမှာ ရခိုင်ပြည်နယ် အတွင်း ရောက်ရှိ၍ အသုံးပြုလျှက် ရှိပါသည်။
- Technical assistance အတွက် ယခင်က ဟောင်းနွမ်း၍ ချောင်းအတွင်း သောင်ထွန်းကာ ရေယာဉ်များ ဆိုက်ကပ်ရန် အဆင်မပြေသော စစ်တွေမြို့ ဆိပ်ခံ တံတားနှင့် တောင်ကုတ်မြို့ရှိ ပျက်စီးနေသော ကွန်ကရစ် ဆိပ်ခံ တံတားများ အတွက် IWT ရေယာဉ်များ ဆိုက်ကပ်၍ ခရီးသည်များ လွယ်ကူ ချောမွေ့စွာ အတက်/အဆင်း ပြုလုပ်နိုင်ရေး ဖိုင်ဘာ ဆိပ်ခံ (၂) စင်း တပ်ဆင် အသုံးပြုရေး စီမံကိန်း (Project) ကို ညှိနှိုင်း တောင်းခံခဲ့ပါသည်။
- အဆိုပါ ဆိပ်ခံတံတား (၂) စင်း၏ ကျသင့် တန်ဖိုးမှာ ဂျပန်ယန်း (၉၀.၂၄) သန်း ရှိကာ ဂျပန်နိုင်ငံရှိ Japan International Cooperation System (JICS) က ဂျပန်နိုင်ငံတွင် တင်ဒါခေါ်ယူခဲ့ပြီး၊ တင်ဒါ အောင်မြင်သူ HELICOM CORPORATION INC က ၄င်းတို့ အစီအစဉ်ဖြင့် စံချိန် စံညွှန်း နှင့်အညီ ဂျပန်နိုင်ငံတွင် အပိုင်းလိုက် တည်ဆောက်ကာ ပင်လယ်ကူး သင်္ဘောကြီးဖြင့် တင်ဆောင်၍ ပြည်ပမှ တိုက်ရိုက် တင်သွင်း လာခဲ့ပြီး၊ ရန်ကုန် ဆိပ်ကမ်းသို့ (၁၇.၅.၂၀၁၈) ရက်နေ့တွင် ရောက်ရှိခဲ့ပါသည်။
- ဆိပ်ခံတံတား တပ်ဆင်ခြင်း လုပ်ငန်းကို ဂျပန် အင်ဂျင်နီယာ ပညာရှင်များနှင့် ပြည်တွင်း ရေကြောင်း ပို့ဆောင်ရေး ဝန်ထမ်းများမှ ပူးပေါင်း၍ (၂၇.၅.၂၀၁၈) ရက်နေ့မှ စတင်၍ ဆောင်ရွက်ခဲ့ရာ စစ်တွေဆိပ်ကမ်းကို (၈.၆.၂၀၁၈) နေ့ တွင် လည်းကောင်း၊ တောင်ကုတ် ဆိပ်ကမ်းကို (၂.၇.၂၀၁၈) ရက်နေ့တွင် လည်းကောင်း ပြီးစီးခဲ့ပြီး ဖြစ်ပါသည်။
- အဆိုပါ ဆိပ်ခံမှာ ဖိုက်ဘာ အမျိုးအစားဖြစ်ပြီး အတိုင်းအတာမှာ အလျား ၃၀ မီတာ၊ ဗျက် ၆ မီတာနှင့် ဇောက် ၁ မီတာရှိပါသည်။ ကုန်းပတ်တွင် သစ်မာသားဖြင့် ခင်းထားပြီး ဖိုက်ဘာ ဗော အရေအတွက် ၉၀ လုံးဖြင့် ဆက်စပ် တည်ဆောက် ထားရှိပါသည်။ အဆိုပါ ဆိပ်ခံသို့ အလူမီနီယံဖြင့် ပြုလုပ်ထားသည့် အလျား ၁၀ မီတာ၊ အနံ ၂ မီတာ နှင့် လက်ရန်းတန်း အမြင့် ၁.၁ မီတာ ရှိသည့် အတက်/အဆင်း တံတားဖြင့် ကမ်းကပ်ခုံကို ချိတ်ဆက် ထားရှိသဖြင့် ရေယာဉ်များ ကပ်ခွာစဉ်နှင့် ခရီးသည်များ အဆင်ပြေစွာ အတက်/အဆင်း သွားလာနိုင်ပါသည်။ အဆိုပါ ဆိပ်ခံ တံတားများတွင် ပြည်တွင်းရေကြောင်း ပို့ဆောင်ရေး ရေယာဉ်များ ဆိုက်ကပ် အသုံးပြုသွားမည် ဖြစ်ပါသည်။
